• اهم المعالم السياحية في براغ Prauge

العاصمة التشيكية براغ. وتلقب بالمدينة الذهبية ومدينة الأبراج. أحد أسباب عراقة وجمال هي المدينة هو انها لم تتأثر إلا شي بسيط بالحر*ب العالمية الثانية. لذلك بتشوفو فيها الطابع الأوربي القديم الحقيقي. فاللي حابب يشوف هاد الجو عليه بالذهاب لبراغ.

كانت زيارتي بشهر ديسمبر السنة الماضية وتحديداً بوقت الكريسماس. رغم البرد ولكن كان الجو كتير حلو وبرأيي بعد ماشفت عدة مدن اوربية بهي الفترة. براغ وبرلين من أجملهم بهالوقت.

نصيحة يلي بدو يصرف مصاري للعملة المحلية مايصرف بالمحطات او المطار. جوا البلد السعر اقل ومتوفرين بكل مكان. بس برأيي مافي داعي ابداً لانو بتقدرو تدفعو بالكرت بكل مكان حتى بالأسواق الشعبية.

وهي بعض الأماكن السياحية يلي زرتها:

– البلدة القديمة والساحة Old Town Square

كيف مامشي الواحد هنيك رح يشوف أماكن وحارات قديمة كتير ومحلات بيع القطع الكريستالية يلي مشهورين بصناعتها منتشرين بكل مكان. الساحة محاطة من كل الاتجاهات بأبنية قديمة جداً وتاريخية وفيها كتير قهاوي ومطاعم وبوقت الكريسماس بكون في اسواق الميلاد الشهيرة.

– ساعة براغ الفلكية Prague Astronomical Clock

تعتبر ثالث أقدم ساعة فلكية بالعالم وأقدم وحدة لازالت تعمل. يعود أول ذكر مسجل للساعة بعام 1410 وتقول الأسطورة أن المدينة ستعاني في حال تم إهمال الساعة.
يوجد شخصيات متحركة بتم تحريكها على مدار الساعة وبتمثل أربع شغلات كانت محتقرة بالفترة يلي بنيت فيه الساعة وهنن: الغرور وبمثله شخص معجب بنفسه مع مرآة والبخيل يلي معو كيس من الذهب والموت على شكل هيكل عظمي والشخصية الأخيرة تمثل الشهوة والملذات الدنيوية. ووقت يقرع الهيكل العظمي ( شخصية الموت) الجرس بتهز جميع الشخصيات رؤوسها مما يدل على عدم استعدادهم للذهاب.

– جسر تشارلي Charlie Bridge

جسر حجري مبني من القرون الوسطى وكان هو الرابط الأكثر أهمية بين قلعة براغ والمدينة القديمة. الجسر كتير حلو ومنو بتشوفو معالم كتير من براغ. وبتلاقو في كتير رسامين موجودين دائماً.

– برج المدينة القديمة Old Town Bridge Tower

برج حجري قديم مباشرة جنب جسر تشارلي. ثمن التكت حوالي 10 يورو للصعود لفوق والمنظر كتير حلو وبتشوفو اغلب معالم براغ.

– قلعة براغ Prague Castle

تم بناء هي القلعة بالقرن التاسع الميلادي بمساحة حوالي 4300 متر مربع وهي المقر الرسمي لرئيس الجمهورية.
كانت القلعة مقر للسلطة لملوك بوهيميا وأباطرة الرومان المقدسين ورؤساء تشيكسلوفاكيا.
القلعة موجودة على تلة وهاد الشي زاد من جمالها ومنظرها الشامخ.

– متحف الأوهام Museum of Fantastic Illusions

هو متحف صغير للخدع البصرية. عبارة عن غرف فيها رسومات وصور بكل مكان. بكون فيها الإضاءة والقياسيات والزوايا كلها مبنية بطريقة معينة بحيث بيكون المنظر بالصورة كأنو الشخص بالحقيقة بهاد المكان بدون مايكون في اي تعديل بالصورة طبعاً.

– حديقة الحيوان Prague Zoo

باعتبار عندي اهتمام كتير بحدائق الحيوان فبحب زورها بأي مكان برحلو. برأيي هي من أجمل الحدائق بأوربا من ناحية جمال الحديقة نفسها وحجمها. ولكن بالنسبة لعدد وتنوع الحيوانات الموجودة فهي عادية وبرأيي حديقة برلين هي الأفضل. حديقة حيوانات براغ تقع على أطراف مدينة براغ بمنطقة طبيعية وهاد يلي بيعطيها الجمالية.

طبعاً براغ لسا فيها كتير شغلات وأماكن حاولت اختصر قدر المستطاع حتى مايكون البوست طويل. باختصار براغ مدينة ساحرة وجميلة كتير ويلي بحب الأجواء القديمة والتاريخ والآثار فطبعاً براغ من أفضل الخيارات.

أي استفسار جاهز ان شاءالله وأتمنى لكم سفراً ممتعاً ❤️